أكتب اليوم بناءاً على نداء رامي الذي استعجب عدم ذكر المدونات المصريات ليوم المرأة و التعليق و لا أي حاجة. شوف يا ابني، أنا اكتشفت النهارده من مدونتك إن إمبارح كان يوم المرأة. أشكرك طبعاً لاهتمامك و لأنك غير منحاز (بغير عدل يعني) و أيضاً لذكرك المعاكسات و قلة الأدب إللي بنشوفها كل يوم.
يجوز أنا ما سمعتش عن يوم المرأة امبارح لأني لم أفتح التليفزيون (كان عندي تمرين كيك بوكسينج) و بعدين الدنيا مطرت و كانت مزحولة! و لذلك أنا أجهل ما إذا كانوا تعمدوا تجاهل يوم المرأة و لا قدموا أطيب التهاني إللي لا بتقدم و لا تأخر. يعني بالذمة هيعملوا للمرأة إيه؟؟ ما هما كل الستات دايرين في الساقية.. الشغل و البيت و الأولاد و المعاكسات و القرف ... و هي طبعاً لازم تحط لسانها في بقها و تسكت.. أصلها لما تتكلم هتقول إيه؟ قصدي مين هيعبرها؟ و هيعملولها إيه؟
المشي في الشارع فعلاً مغامرة محفوفة بالمخاطر كما ذكر رامي و على فكرة راكبات السيارات الخاصة لا تسلمن من المعاكسات و السائقين إللي بيكسروا عليهم و بيعرضوهم للحوادث علشان هم صبيان دمهم خفيف! (مرة واحد كان بيكسر علينا و إحنا 3 بنات علي كوبري أكتوبر- لو كانت أعصابها فلتت كنا نطينا من على الكوبري!)
و بعدين الكبت إللي عند الناس ده مش طبيعي، كأنهم أول مرة يشوفوا بنات، و معلش بقى إللي بيقول إننا عثرة، ما يغض هو بصره أحسن، يبص الناحية التانية و يستغفر ربنا بس ما يميلش على ودني و يوشش كلام ما أسمعش منه غير رنة ززززز أو سسسسس، ما هي دي اسمها قلة أدب.
و بعدين في ناس ولاد حلال بيعشقوا إنهم يعلقوا على طولي (أنا طولي 148 سم) و بالتالي أنا لا أسلم من كلمتي "يا قصير!" و "يا أزعة!" كأنني أولاً مش عارفة إنني قصيرة ، ثانياً، أنا واحدة محترمة و تعليمي أكيد أعلى من تعليم القرد إللي بيعاكسني و مش من حقه يقل أدبه كده و ثالثاً هو بيتريق على خلقة ربنا ليه؟ يعني لو واحد مناخيره كبيرة، ما يصحش أقول له يابو مناخير! ولا الفيل أبو زلومة! علشان دي خلقة ربنا و عيب نقول كده.
هذا طبعاً إلي جانب أننا (أي الفتيات و السيدات .. إلخ) نضطر إلي المشي زجزاج في الشارع، علشان كل شوية واحد ظريف يتحرك في إتجاهنا و يميل علينا! يا أفنديا، ما حدش علمكم و أنتم صغيرين تمشوا على خط مستقيم؟؟ ما هو مش معقول كل ما واحد يشوف واحدة يغير سكته و يمشي بالورب علشان يخبط فيها.. بجد نفسي أعرف إيه المتعة في إنك تخبط واحدة في الشارع؟؟ دي بس المواقف العادية إللي بتحصل كل يوم، في طبعاً حاجات تانية و كلنا نتعرض لها من حين لآخر و بسببها ندخل بيوتنا معيطين و لا داعي لذكرها الآن.
أنا بسأل بس.. ليه ما بيحترموش الستات؟ و سبيك من هي محترمة و لا لأ، إللي بيحترم حد، بيحترمه لأنه هو انسان محترم بغض النظر عن مين إللي قدامه!
أنا تكلمت عن موضوع الشارع لأنه بصراحة أحد صراعاتي اليومية.. أنا عارفة إن مشاكلنا كتير لكن يجوز هو ده إللي بيمسني دلوقت.
و أرجع و أقول تاني، هيعملوا إيه للمرأة؟؟ لما يعرفوا يحترموها الأول في الشارع، يبقوا يعملولها يوم عندنا.